ACTIVIDADES
Acto de clausura da exposición “A Coruña, porto negreiro”
Como peche da exposición, NORMAL acolle a conversa «A Coruña, porto negreiro. Historia, colonialismo e identidade», nun encontro para reflexionar sobre as pegadas do colonialismo na cidade, os silencios da memoria oficial e a necesidade de construír novas narrativas desde unha mirada crítica, descolonial e antirracista.
Participarán María Reimóndez e as comisarias Cristina Botana e Zinthia Álvarez Palomino. Modera Yosehanna Ledesma
Será o vindeiro martes, 15 de setembro, ás 19:00 horas na Sala Cubo de NORMAL.
OBRADOIROS
Aberto o prazo de matrícula para os obradoiros da Área de Cultura da UDC
Hoxe ábrese o prazo de inscrición nos obradoiros culturais e Aulas de Teatro, Danza e Música da UDC. Hai actividades programadas en NORMAL e tamén no Campus de Ferrol.
Podes acceder a toda a información no apartado “OBRADOIROS” da nosa web ou desde a nova ligada ao botón inferior.
RESIDENCIAS
Os artistas Raquel G. Ibáñez e Rodríguez-Méndez gañadores da VI edición do Programa de Residencias Artísticas que o Centro de Arte FMJJ convoca en colaboración coa UDC e NORMAL
O Centro de Arte Fundación María José Jove (FMJJ), en colaboración coa Universidade da Coruña (UDC) e NORMAL – Espazo de Intervención Cultural, deu a coñecer a resolución da sexta edición do seu Programa de Residencias Artísticas. Os creadores seleccionados nesta convocatoria foron o galego Carlos Rodríguez-Méndez e a madrileña Raquel G. Ibáñez.
EXPOSICIÓNS
A Coruña, porto negreiro
No marco do proxecto “A Coruña entre memorias: historia, colonialismo e identidade” NORMAL inaugura o 24 de abril ás 19:00 a exposición “A Coruña, porto negreiro”.
“A Coruña, porto negreiro” propón unha revisión crítica da memoria colonial da cidade e ao seu papel no tráfico transatlántico de persoas escravizadas.
Este percorrido pola memoria colonial coruñesa convida a recoñecer as pegadas que este legado deixou na arquitectura, na economía e no imaxinario urbano, ao tempo que interpela sobre como estas herdanzas continúan condicionando o presente.
O acto presentará o proxecto “A Coruña entre memorias: historia, colonialismo e identidade”, no marco do cal se desenvolve esta exposición. A continuación contaremos cunha actuación de repentismo poético liderada por Quinny Martínez y Las Tamboreras del Caribe, ao tempo que explicaremos o percorrido e os contidos da mostra.
Para pechar o encontro ofreceráselle un brinde ás persoas asistentes que abrirá un espazo de intercambio, diálogo e reflexión arredor das temáticas tratadas.
A actividade é aberta ao público en xeral, ata completar a capacidade da sala.
Isto é NORMAL
A Área de Cultura da Universidade da Coruña organiza unha ampla variedade de actividades culturais nos campus da Coruña e Ferrol. Estas inclúen exposicións, obradoiros, conferencias, proxeccións de cine, concertos, entre outras iniciativas, dirixidas tanto á comunidade universitaria como ao público en xeral.
A programación cultural coordínase desde Normal, o espazo de intervención cultural da UDC, situado no Campus de Riazor.