O Centro de Arte Fundación María José Jove (FMJJ), en colaboración coa Universidade da Coruña (UDC) e NORMAL, Espazo de Intervención Cultural, lanzan a V Edición do Programa de Residencias Artísticas, unha iniciativa destinada a apoiar a creación artística que, desde unha reflexión crítica, se aproxime ás dinámicas, memorias e resonancias do contexto máis próximo.
Este programa ten como obxectivo proporcionar aos artistas unha contorna propicia para a creación e investigación, fomentando o desenvolvemento dun marco conceptual que axude a interpretar problemáticas contemporáneas nas súas dimensións sociais, culturais e territoriais.
Esta edición abre a convocatoria a dúas residencias artísticas, dotadas con 6.000 euros cada unha, destinados a honorarios, gastos de produción e viaxe. Ademais, proporciónanse os seguintes recursos aos/ás artistas seleccionados/as:
- Espazo de traballo individual no Espazo de Intervención Cultural Normal.
- Aloxamento nunha residencia universitaria na Coruña.
- Acompañamento curatorial durante o desenvolvemento do proxecto.
- Presentación pública dos resultados ao finalizar a residencia.
As residencias terán unha duración mínima dun mes, con posibilidade dunha prórroga de ata tres meses. Os proxectos deberán realizarse durante o terceiro cuadrimestre do ano, entre setembro e decembro de 2025.
Prazo de inscrición
O prazo de inscrición estará aberto desde hoxe 17 de marzo ata o 14 de xuño de 2025. As solicitudes deben enviarse ao enderezo electrónico normal.comunicacion@udc.gal, anexando o formulario de inscrición e a documentación requirida (DNI, síntese do proxecto, CV e carta de intencións).
Máis información e bases
Resolución da convocatoria
A resolución da convocatoria publicarase a finais de xullo de 2025.
Valoración de propostas
As propostas serán avaliadas por un xurado composto por:
- Ángel Calvo Ulloa, crítico de arte e comisario.
- Susana González, comisaria e directora do Centro de Arte FMJJ/Colección de arte FMJJ.
- Marta Mestre, comisaria do Museo de Arte Contemporánea MAC/CCB, Lisboa.
- Yolanda Pérez Sánchez, responsable de Normal e adxunta de Cultura da UDC.
Criterios de selección
As propostas serán valoradas en función da súa orixinalidade e innovación, a coherencia cos obxectivos da convocatoria e a súa capacidade para xerar colaboracións multidisciplinares.