Participantes seleccionados na IV Edición do Programa de Residencias Artísticas Fundación María José Jove

Blanca Gracia (Madrid, 1989) e Fermín Jiménez (Pamplona, 1979) resultaron gañadores da IV Edición do Programa de Residencias Artísticas Fundación María José Jove, en colaboración coa Universidade da Coruña, a través de NORMAL. Espazo de Intervención Cultural da UDC. O xurado valorou a “adecuación ao propósito da convocatoria e a calidade das propostas, así como as relacións co contexto formuladas desde a fidelidade ás súas respectivas linguaxes artísticas”.

• Blanca Gracia presentou Yegua Nocturna, tradución literal da palabra inglesa nightmare (‘pesadelo’), en que fusiona animación experimental e exploracións sonoras en colaboración coa cantante Faia Díaz. E preséntase como unha viaxe desde a lóxica cotiá cara ao onírico e o simbólico, reflexionando sobre a dualidade entre o racional e o irracional. O obxectivo central é investigar o papel histórico e contemporáneo da maternidade a través das nanas e romances tradicionais galegos. Faia Díaz achegará a súa voz, vinculada ao folclore galego, mentres que Blanca Gracia propón unha aproximación visual aos arquetipos do conto e a súa relevancia no contexto sociopolítico actual.
• Fermín Jiménez, pola súa banda, presentou o proxecto Arder a auga  que continúa a proposta iniciada por Hay mares en las montañas, investigando as diversas formas e relacións entre xeoloxía, tempo e a distribución de mares e montañas. Establece un vínculo entre arte e ciencia ao traballar con prototipos de cementos elaborados a partir de cunchas de moluscos e fósiles mariños, cun enfoque particular en Galicia por mor da relevancia da súa industria conserveira. En colaboración con Belén González Fonteboa, catedrática da Facultade de Enxeñaría de Camiños, Canles e Portos da UDC, establécese un achegamento aos estudos avanzados sobre estes cementos.