Con motivo do Día das Artes Galegas, NORMAL acollerá unha charla de Mercedes Rozas sobre o fotógrafo José Suárez
Estética e compromiso na fotografía de José Suárez é o título da charla que impartirá Mercedes Rozas o martes 8 de abril ás 17:00 horas na Aula 1 da Universidade Senior.
Mercedes Rozas é licenciada en Xeografía e Historia, na especialidade de Arte Moderna e Contemporánea, pola Universidade de Santiago de Compostela. Forma parte dos Padroados do Museo do Pobo Galego e a Fundación Otero Pedrayo.
Desde a década dos 80 desenvolveu o seu traballo como crítica de arte con conferencias e artigos para xornais como El Ideal Galego, El Correo Gallego, La Voz de Galicia e Nós Diario, así como colaboracións para revistas especializadas e institucións públicas e privadas.
Foi coordinadora xeral de exposicións do Xacobeo desde mediados dos anos noventa ata o 2004. Ten traballado habitualmente en distintos proxectos con institucións como O Consorcio de Santiago, Afundación, Xunta de Galicia, Universidade de Santiago, Museo Barjola e o Instituto Cervantes.
No traballo de comisaria ten proxectado mostras colectivas como Diálogos co silencio no marco da Capitalidade Cultural de Santiago do ano 2000, Hipervínculos, A arte da semellanza, Camiño de Volta, A paisaxe e a súa pegada, Figurando lembranzas, Dobre Quadratura ou Libros Conversos. No comisariado de artistas individuais están, entre outras, as exposicións dedicadas a Eugenio Granell, Francesc Torres, Quintana Martelo, Luis Gabú, Aurichu Pereira, Julia Ares ou Diego Vidal. Especialízándose máis en concreto na obra de Carlos Maside, Xosé Luis de Dios e Leopoldo Nóvoa.
En relación a obra de José Suárez ten escrito varios artigos para xornais, en concreto para La Voz de Galicia e Nós Diario, e participado no especial do 2025 que a Revista Raigame dedicou ao fotógrafo alaricano.