O xoves 10 de abril ás 19.30 h na sala de exposicións de NORMAL, terá lugar a inauguración da exposición SOBRE TODO, de Enar de Dios Rodríguez.
SOBRE TODO é un proxecto artístico que toma como protagonista o espazo aéreo para configurar unha reflexión política e poética sobre como este lugar está en proceso de converterse en territorio, e como este acto de territorialización pode ilustrar problemáticas actuais relacionadas co Capitaloceno e as súas catástrofes ancestrais (aquelas que son simultaneamente pasado e presente). Partindo dun longo proceso de investigación sobre o lugar que se expande literalmente sobre todo, SOBRE TODO fala dunha gran variedade de temas urxentes como a continua extinción de determinadas especies voadoras, as violentas tecnoloxías de control a distancia, a lexislación do espazo ultraterrestre, o extractivismo que está por chegar, así como a constitución intrinsecamente colaborativa do aire, ou a capacidade política do pulmón na súa loita por respirar.
Do mesmo xeito que en traballos anteriores da artista, SOBRE TODO céntrase nun espazo “en construción”: un lugar con fronteiras indefinidas, aínda non cartografado, cunha lexislación case inexistente, e que, a pesar diso, está a ser ocupado e explotado. O resultado deste interese e esta investigación materialízase nun ensaio audiovisual acompañado dunha serie de pezas producidas especificamente para Normal que a artista creou durante a súa residencia na institución. Todo iso presentado nunha instalación que ofusca o eixo vertical, pregúntase onde está o horizonte e convida a repensar este soporte que nos suxeita á vida aínda a estares por enriba de todo.
A exposición poderá visitarse entre o 10 de abril e o 10 de xullo de 2025, na Sala de Exposicións de NORMAL, en horario de 9 a 21 h.
nara is neus
Na inauguración, nara is neus ofrecerá unha intervención sonora.
nara is neus — Neus Abellan (ela/ele) — é física, música e produtora de música ambient e bandas sonoras de Barcelona. No seu traballo combina elementos de diversos subxéneros para compoñer música cun distintivo son cativador. A súa obra distínguese por unha métrica complexa, melodías envolventes, e paisaxes sonoras absorbentes que transportan xs oíntes a diferentes reinos e texturas ambientais, suscitando con elas e eles unha ampla gama de afectos. As súas cancións teñen un vínculo especial con reflexións existenciais capaces de evocaren unha gran carga emocional.
As súas liñas de investigación recentes van dende a exploración dos límites entre o mundo orgánico e o dixital, ata reinterpretacións de pezas clásicas, deseño de son para videoinstalacións, bandas sonoras e cancións autoxenerativas, sen deixar de experimentar con novas metodoloxías e sons que parten dunha gran variedade de influencias musicais.
nara is neus tamén traballa como xefa de contidos en dublab.cat.
