Con motivo do Día das Artes Galegas, NORMAL acollerá dous eventos dedicados á figura de Isaac Díaz Pardo.
O martes 1 de abril, ás 19:00 horas, a historiadora e investigadora Iria-Friné Rivera Vázquez impartirá a conferencia “A historia no deseño, o deseño na historia“. Durante a súa intervención, analizará a aplicación práctica de modelos, precedentes e estéticas previas que Isaac Díaz Pardo incorporaba aos seus proxectos. Ademais, afondará nas múltiples influencias recoñecibles na súa obra, especialmente na dinámica herdada do seu pai, Camilo Díaz Baliño.
O mércores 2 de abril, ás 16:30 horas, proxectarase o material audiovisual que acompaña o libro Doutor Isaac Díaz Pardo, publicado en 2011. Esta obra recolle o acto de investidura de Díaz Pardo como Doutor Honoris Causa pola Universidade da Coruña en 2007 e inclúe os documentais A construción cultural e Memoria viva. O primeiro conta con intervencións de poetas e artistas, mentres que o segundo presenta testemuños de figuras da cultura galega como Avelino Pousa Antelo, Xosé Neira Vilas, Mariví Villaverde e Beatriz Amigo.
Ambos eventos terán lugar no Cubo de NORMAL e permitirán achegarse á vida e legado de Isaac Díaz Pardo, unha figura fundamental na cultura galega contemporánea.