O vindeiro venres 14 de febreiro, Normal acollerá o acto de clausura da exposición “Fío do Norte”, unha xornada que combinará unha aproximación analítica á mostra e unha experiencia sonora.
A programación comezará ás 19:00 h cunha visita guiada conducida polo comisario da exposición, Juan Luis Toboso, quen ofrecerá unha análise detallada das obras e do discurso conceptual que articula o proxecto.
A continuación, terá lugar unha sesión de escoita a cargo do artista de Porto, Diogo Tudela, programador e investigador recoñecido polo seu traballo na intersección entre linguaxes formais, programación e creación sonora. Tudela propón un percorrido sonoro no que combina técnicas de improvisación e simulación para explorar novas narrativas auditivas.
A xornada será a ocasión perfecta para despedir a exposición “Fío do Norte” e vivir unha experiencia sonora única no auditorio de Normal. Agardámoste!
Entrada libre ata completar aforo.