No marco das actividades organizadas para celebrar o Día das Letras Galegas, o 16 de maio as 18:00 h terá lugar a charla de Manuel Rivas, un dos escritores máis importantes da literatura galega contemporánea, Premio Nacional das Letras Españolas 2024 e Premio CEDRO 2025 polo seu activismo na defensa dos dereitos de autor e da propiedade intelectual. Na súa charla, Rivas compartirá as súas reflexións sobre as temáticas presentes no seu último libro, Tras do Ceo (2024).
Manuel Rivas é contrabandista de palabras e argalleiro de vidas. As súas historias enchen o corazón de milleiros de lectoras e lectores mundo adiante.
Na súa obra narrativa, escrita en galego, traducida a máis de trinta linguas e publicada polas máis prestixiosas editoras literarias internacionais, destacan títulos como Un millón de vacas (1989), Os comedores de patacas (1991), En salvaxe compaña (1994), Que me queres, amor? (1996), O lapis de carpinteiro(1998), Os libros arden mal (2006), Todo é silencio (2010), As voces baixas (2012), O último día de Terranova (2015), Vivir sen permiso e outras historias do Oeste(2018) e Tras do Ceo (2024).
Entre as súas obras de poesía figuran A desaparición da neve(edición cuatrilingüe, en galego, castelán, catalán e éuscaro, en 2009), A boca da terra (2016) e O que fica fóra (2021). Entre os seus ensaios máis recentes, de natureza crítica, destacan Contra Todo Isto(2018) e Zona a defender: a esperanza indócil (2020).
Nacido na Coruña, en outubro de 1957, Manuel Rivas comezou a traballar de aprendiz en El Ideal Gallego aos 15 anos. Estudou Ciencias da Información en Madrid e colaborou en medios de prensa, radio e televisión. Foi correspondente de El País en Galicia, director da revista independente Luzes de Galiza e, na actualidade, codirixe a nova Luzes. Unha selección das súas reportaxes, El periodismo es un cuento, estúdase como libro de referencia en varias facultades de xornalismo.
As súas obras mereceron o premio da Crítica, galega e española, en seis ocasións. Foi premio nacional de Narrativa por Que me queres, amor? e premio de honor das Letras Españolas en 2024.