O encontro terá lugar o martes 15 de setembro, ás 19:00 horas, na Sala Cubo de NORMAL
A exposición «A Coruña, porto negreiro» chegará ao seu remate cunha conversa aberta sobre a memoria colonial, a súa configuración social e as pegadas que ese pasado continúa deixando a día de hoxe no contexto da cidade.
O encontro titulado «A Coruña, porto negreiro. Historia, colonialismo e identidade», terá lugar o martes 15 de setembro, ás 19:00 horas, na Sala Cubo de NORMAL, e nela participarán a escritora e tradutora María Reimóndez, e ambas as comisarias da exposición: a investigadora Cristina Botana e a xornalista e investigadora Zinthia Álvarez Palomino; exercerá de moderadora Yosehanna Ledesma.
Nun momento marcado polos recentes acontecementos en Ceuta, onde a chegada de persoas migrantes veu acompañada de discursos de rexeitamento, mobilizacións e un intenso debate público sobre as fronteiras, a convivencia e os dereitos humanos, esta palestra propón unha reflexión colectiva sobre as pegadas do colonialismo na cidade da Coruña, os silencios da memoria oficial e a necesidade de construírmos novas narrativas desde unha perspectiva crítica e antirracista.
A partir das cuestións que atravesan a propia exposición —que historias foron contadas, cales quedaron fóra e como esas herdanzas continúan presentes no espazo urbano e nos imaxinarios actuais—, as participantes abrirán un espazo de diálogo compartido para pensar como as lóxicas coloniais seguen atravesando as nosas sociedades e que futuros comúns podemos construír desde a memoria, a xustiza e o recoñecemento.
Neste sentido, preténdese abrir un espazo de diálogo sobre a construción de futuros comúns baseados na memoria, a xustiza e o recoñecemento.
PARTICIPANTES
María Reimóndez é doutora en Tradución e Interpretación, tradutora e intérprete, escritora e activista galega. Desenvolveu unha ampla traxectoria nos ámbitos da literatura, a tradución feminista e descolonial, os feminismos, a hexemonía lingüística e os enfoques LGTBIQA+. É fundadora de Implicadas no Desenvolvemento e da Asociación Galega de Profesionais da Tradución e da Interpretación. Entre os seus recoñecementos figuran o Premio Plácido Castro e o Premio Follas Novas á mellor tradución. A súa obra máis recente é A casa do amo. Unha análise do discurso colonial e racista na literatura galega (Pol·len, 2026).
Cristina Botana é doutora en Arquitectura e Urbanismo pola UDC e mestrada en Cidade e Urbanismo pola UOC. Docente e investigadora na UDC e na UOC, desenvolve o seu traballo arredor dos estudos urbanos críticos, as prácticas informais, os ecofeminismos, o territorio e o pensamento descolonial. Foi investigadora posdoutoral Juan de la Cierva na USC e é directora da Escola Decolonial Galega. Entre outros proxectos, codirixiu A Coruña entre memorias: historia, colonialismo e identidade e foi galardoada co Premio COAG 2019 de Divulgación, Investigación e Deseño pola exposición Éxodo.
Zinthia Álvarez Palomino é xornalista e investigadora especializada en migracións, memoria e enfoque descolonial. Doutoranda en Estudos Culturais: Memoria, Identidade, Territorio e Linguaxe pola USC, conta con formación especializada en pensamento caribeño e feminismo descolonial. É impulsora do proxecto Mulleres negras que cambiaron o mundo.
A conversa estará moderada por Yosehanna Ledesma, graduada en Comunicación Social pola UASD e en Relacións Laborais e Recursos Humanos pola UDC. É técnica do Programa sensibilización contra o racismo e a xenofobia en Accem, coordinadora do grupo de participación de EAPN Galicia e forma parte do colectivo Afrogalegas. Tamén desenvolve actividade como comunicadora, formadora e colaboradora en distintos medios.