Lugares:
1 NORMAL
Espazo de Intervención Cultural [UDC]
2 Conservatorio Superior de Música da Coruña
Data:
18—12—2025
Horario 11:00h. — 19:15h
Info:
O programa de residencias artísticas do Centro de Arte FMJJ, en
colaboración coa Universidade da Coruña a través de NORMAL. Espazo de Intervención Cultural, artéllase como un espazo para fortalecer o ecosistema cultural e ampliar as súas conexións con artistas vinculados ao territorio, tanto de Galicia como de fóra dela.
Cada edición concíbese como un espazo de encontro e construción de redes, onde artistas, institucións e comunidades se cruzan,
intercambian procesos e visibilizan prácticas que, na súa diversidade, revelan novas posibilidades de colaboración, investigación e experimentación en Galicia. Este encontro é tamén unha plataforma para presentar as intervencións culturais, ambientais, sociais ou simbólicas desenvolvidas, co fin de promover a reflexión crítica sobre a creación artística contemporánea e a súa relación cos contextos nos que se leva a cabo.
Nesta III edición do Encontro Dentro–Fóra. Arte Contemporánea
en Galicia preséntanse os proxectos desenvolvidos na edición anterior —Fermín Jiménez Landa e Blanca Gracia (con Faia Díaz)— xunto cos procesos en curso das persoas residentes actuais —Ibon Aranberri e Raphael Escobar—. Alén das presentacións individuais, o programa propón un marco para dialogar sobre territorios, ruralidades, memoria, arquivo, creación colectiva, afectos e transformación social
Mañá
11:00 – 11:15
Presentación III Encontro Dentro—Fóra. Arte Contemporánea en Galicia.
A cargo de Cristina Naya, vicerreitora de Cultura da Universidade da Coruña, e Susana González, directora do Centro de Arte FMJJ.
11:15 – 12:00
Raphael Escobar — Visita ao obradoiro O coro de sons
Raphael Escobar converte a arte nun acto de xustiza social: a través de intervencións, educación non formal e creación colectiva, dignifica persoas invisibilizadas de barrios populares, persoas sen fogar, usuarias de drogas e comunidades periféricas, esvaecendo os límites entre a institución artística e a vida cotiá.
Tras un proceso de investigación na Coruña, inicia un proxecto colaborativo invitando a persoas traballadoras de sectores habitualmente subalternos (limpeza, hostalaría, mantemento,
construción…) a conformaren un coro de asubíos e cantaruxadas, resignificando os seus ritmos, traballos e corpos como parte dunha performance comunitaria.
12:00 – 12:30 Pausa café
12:30 – 13:15
Ibon Aranberri — Visita ao obradoiro A trama rururbana
Ibon Aranberri retoma a súa investigación sobre a zona montañosa oriental de Galicia —desde o 2007— coa intención de revisar os arquivos e as localizacións orixinais para comprender as dinámicas contemporáneas entre o rural e o urbano, así como a relación entre quen habita o territorio e a súa propia experiencia en dous
tempos distintos. Con isto, propón unha reflexión crítica que integra historia, arquivo e espazo en diálogo.
O proxecto pon de relevo este carácter revisitado da súa obra: moitos dos seus traballos son concibidos como procesos abertos que se reactivan baixo unha nova perspectiva. Neste sentido, recuperar A trama rururbana, un proxecto inicialmente concibido para desenvolverse en Galicia en colaboración co CGAC e posteriormente abandonado, implica avaliar de novo a súa formulación, reabrindo a posibilidade de artellar outro tipo de conversa vinculada á memoria, ao territorio e ao cambio social e institucional no momento presente.
13:15 – 14:00
Fermín Jiménez Landa — Visita ao obradoiro Arder a auga
Partindo da experimentación con cementos desenvolvidos a partir de cunchas de moluscos e do acompañamento da profesora
Belén González Fonteboa, catedrática da Facultade de Enxeñaría de Camiños, Canais e Portos da UDC, Arder a auga reflexiona sobre a industria conserveira galega, os ciclos de residuos mariños e a capacidade da arte para intervir nos procesos materiais.
14:00 – 16:00
Xantar
Tarde
16:00 – 17:00
Conversa / Debate
Coa participación de Ángel Calvo Ulloa e Marta Mestre, comisarios e integrantes do comité de selección, xunto con Susana González.
A conversa convida o público asistente a debater de maneira crítica sobre o estado da cuestión.
O espazo procura activar un diálogo horizontal que permita contrastar perspectivas e ampliar o marco conceptual e operativo da creación artística en Galicia.
17:00 – 17:45
Blanca Gracia [CON Faia Díaz] — Egua nocturna
O proxecto explora a figura feminina como nutriz e transmisora de memoria, entrelazando maternidade, corpo, mitoloxía e imaxinarios
afectivos desde unha perspectiva contemporánea. A proposta fusiona animación experimental con tradición oral galega (nanas e romances).
17:45 – 18:30
Traslado ao Conservatorio Superior
18:30 – 19:15
Performance
Raphael Escobar — O coro de sons
No Conservatorio Superior de Música da Coruña. Performance colectiva que parte da creación dun coro de asubíos e cantaruxadas
con persoas traballadoras convocadas mediante carteis situados en zonas de tránsito laboral (porto, refinaría, estacións etc.). A participación retribúese mediante unha bolsa, grazas á redistribución dos honorarios de produción do artista, situando a colaboración e a comunidade no centro do proxecto. A proposta non é só artística, senón tamén política e social: ofrece unha oportunidade de visibilidade, retribución e cuestionamento das xerarquías culturais, dando voz a persoas traballadoras habitualmente excluídas do circuíto artístico institucional.