De Corpos Presentes regresa a NORMAL en novembro e decembro con mostras escénicas, encontros e prácticas de movemento.
O ciclo De Corpos Presentes regresa a NORMAL en novembro e decembro cunha programación que reúne mostras escénicas, encontros e prácticas de movemento arredor do corpo, a memoria, o son e a percepción. A proposta convida a explorar outras formas de relacionármonos co mundo a través das artes performativas, da experimentación e da investigación artística.
Esta nova edición conta coa participación das artistas Inka Romaní e Carlota Mantecón, que presentan dous traballos en que o corpo se converte nun espazo de memoria, resistencia, vibración e descubrimento sensorial.
A programación comeza o xoves 26 de novembro, ás 20:00 h, na sala de exposicións de NORMAL, coa mostra Volvamos al baile, de Inka Romaní. Entre a conferencia performativa e a danza documental, a peza investiga a dominación exercida sobre as mulleres durante a ditadura franquista a través da danza e da ximnasia. A partir da memoria familiar, dos arquivos e da experiencia corporal, Romaní reconstrúe o relato dunha danza popular que resistiu ata desaparecer, e pregunta que permanece dela nos corpos e na memoria colectiva.
A actividade continúa o venres 27 de novembro, das 11:00 ás 13:00 h, cun encontro titulado Abrir o círculo, tamén con Inka Romaní, que amplía o espazo de reflexión e intercambio arredor das cuestións que atravesan a súa práctica artística.
Xa en decembro, o xoves 3, das 19:00 ás 21:00 h, terá lugar Bailar o espectral, unha práctica de movemento con Carlota Mantecón, unha oportunidade para achegarse neste obradoiro á exploración corporal desde a súa investigación artística.
O ciclo pecharase o venres 4 de decembro, ás 19:30 h, na sala de exposicións, coa mostra Fantasma sonoro, de Carlota Mantecón. Neste solo de danza performativa, a artista investiga a vibración como materia poética e explora as relacións entre o son, a voz e o movemento. A peza propón un espazo de resonancia en que o corpo produce son e, ao mesmo tempo, se transforma a través del, diluíndo os límites entre o audible e o táctil.
As dúas mostras, Volvamos al baile e Fantasma sonoro, serán con entrada de balde.
A través destas propostas, De Corpos Presentes reafirma o seu interese polas prácticas artísticas que abren novas vías de investigación sobre o corpo e a súa relación coa memoria, a escoita, a percepción e a experiencia compartida.
PROGRAMA
- Xoves 26 de novembro | 20:00 h — mostra Volvamos al baile, de Inka Romaní. Sala de exposicións.
- Venres 27 de novembro | 11:00–13:00 h — encontro Abrir o círculo, encontro con Inka Romaní. Aula de Danza.
- Xoves 3 de decembro | 19:00–21:00 h — Obradoiro Bailar o espectral, práctica de movemento con Carlota Mantecón. Aula de Danza.
- Venres 4 de decembro | 19:30 h —mostra Fantasma sonoro, de Carlota Mantecón. Sala de exposicións.
Lugar: NORMAL, Espazo de Intervención Cultural da Universidade da Coruña, Paseo de Ronda 47, 15011, A Coruña
Entrada de balde nas mostras escénicas ata completar a capacidade.
INSCRICIÓNS NO ENCONTRO E O OBRADOIRO
O prazo de inscrición para o encontro con Inka Romaní comeza o 10 de novembro ás 9:00h e remata o día 25 de novembro ás 9:00h
O prazo de inscrición para o obradoiro con Carlota Mantecón comeza o 17 de novembro ás 9:00h e remata o día 1 de decembro ás 9:00h
Para participar no encontro e no obradoiro, é necesario facer a inscrición aquí:
AS ARTISTAS
Inka Romaní
Bailarina e coreógrafa con sede en Valencia, Inka Romaní desenvolve unha práctica artística independente que explora o corpo e o movemento a través das danzas tradicionais, as linguaxes contemporáneas e urbanas e as prácticas somáticas. Formada en danza contemporánea e creación artística, presentou o seu traballo en espazos e festivais internacionais como Sadler’s Wells Theatre (Londres), Tanz im August e o Festival de Marsella. Actualmente é artista asociada ao Mercat de les Flors para as tempadas 2026–2029.
Carlota Mantecón
Bailarina e coreógrafa formada entre Lisboa, Londres e Barcelona, Carlota Mantecón desenvolve desde 2019 unha práctica escénica independente centrada nas relacións entre o corpo, o tacto, a voz, o son e o movemento. Entre os seus proxectos destacan Las voces, Un mismo movimiento e Esto no es una prueba de sonido, nos que investiga novas formas de percepción e interacción corporal. O seu traballo presentouse en contextos artísticos e festivais de España, Portugal e Eslovenia.
CRÉDITOS
Volvamos al baile, de Inka Romaní
Dirección, performance e textos: Inka Romaní
Son: Carles Biano e Manel Ferrandiz
Videoproxección: Fatemeh Fereydoun e Roser Corella
Deseño de vestiario: Teresa Juan
Realización de vestiario: Marta Ródenas e Eloina Escrivá
Acompañamento artístico: Cassandre Muñoz
Iluminación: Raúl León (Laboratorio de Luz. UPV – Valencia)
Produción executiva: Mónica Vázquez
Fotografía e vídeo: Laura Tápia e Fran Garofalo
Distribución: Vicenç Mayans (Palosanto Projects)
Fantasma sonoro, de Carlota Mantecón
Fantasma sonoro, de Carlota Mantecón
Concepto e dirección: Carlota Mantecón
Bailarina: Carlota Mantecón
Deseño de iluminación: Grace Morales
Técnico de iluminación: Héctor Cortés
Asistente de son: Luz Prado
Asistente de movemento: Teresa Lorenzo
Acompañamento: Sandra Gómez
Vídeo e fotografía: Andrea Alvarado
Co apoio de: Teatro Victoria, S/C de Tenerife (presentación e residencia técnica 2026); Cabildo de Tenerife; La Poderosa – Barcelona (In-presentables 2025); Auditorio de Tenerife (residencia 2024); Danza en Breve, Tenerife (residencia 2024); Eima Creació, Mallorca (residencia 2023).
Coproducido por Carlota Mantecón e Intacto Films.
Agradecementos especiais: Luz Prado, Sandra Gómez, Néstor García, Teresa Lorenzo, Virginia Sanz, Juan Carlos Fresnadillo, Darío Barreto, Sara Reyes e A. Brunet.
Máis información en decorpospresentes.gal
Este ciclo conta coa cobertura técnica de producións bo peixe