As pezas de Alicia López e Laboratorio Escénico poderanse ver o xoves 22 de outubro, ás 20:00 horas
NORMAL acolle o vindeiro xoves 22 de outubro, ás 20:00 horas, unha dobre proposta de danza e artes escénicas contemporáneas coa presentación de A vergonza era verde e comeuna a vaca, de Alicia López, e MONTE, de Laboratorio Escénico.
As dúas pezas, concibidas para a rúa e para espazos non convencionais, exploran desde o corpo, o movemento, a palabra e a música cuestións relacionadas coa identidade, a liberdade, a memoria e a relación coa terra.
Os dous espectáculos están cofinanciados polas axudas á distribución escénica da AGADIC.
📅 Xoves, 22 de outubro
🕗 20:00 h
📍 Sala de exposicións de NORMAL
MONTE · Laboratorio Escénico
Danza contemporánea e teatro para rúa e espazos non convencionais
«Ó sol, no monte, a terra respira.
E vou creando o meu camiño.
Levas todo o monte adentro».
MONTE pon en valor historias en feminino de Cuba e Galicia, dous territorios unidos por vínculos ancestrais, pola relación coa terra e pola experiencia migratoria.
A través da danza, a música e a palabra, a peza presenta unha muller que ben puido vivir a emigración de ida e volta: unha muller forte e sabia, coñecedora dos segredos do monte, das herbas, das lendas e das beberaxes, e profundamente vinculada á terra, aos tambores, á voz e á clave.
MONTE reivindica así a memoria desas historias e deses saberes que atravesan xeracións e territorios e que merecen ser contados.
Duración: 25 minutos.
A vergonza era verde e comeuna a vaca · Alicia López
Danza contemporánea e teatro para rúa e espazos non convencionais
A vergonza tende a medrar. Engole canto ten diante.
A vergonza era verde e comeuna a vaca sitúase nese territorio en que o corpo se enfronta ás súas propias ataduras e busca a maneira de rachar con elas.
A peza fala da necesidade de afouteza para facer fronte á vergonza, loitar, liberarse, ser e mostrar aquela humanidade que permanecía escurecida e abafada.
Desde a danza e o corpo, Alicia López propón unha peza concibida para saír dos espazos escénicos convencionais e establecer unha relación directa co lugar e co público.
Duración: 10 minutos.